أخر قصيدة كتبتها
القدس كان اسمها
مااعرفتش أكتب بعدها
إحباط وضيق
ومافيش دقيق غير دقيق الأمريكان
بالدبابات والأرض تطرح جرافات
والسقا مات
والدب دب فوق قلوب المحرومين
والسلام مرفوع شعار
للأنتحار والأنكسار والأنهيار
والأنتظار احسن خيار
ياهلترا أمتى هيجى الدور عليك
ياعمنا راجع تقول للسيف دهب
وأبوالفوارس عنتره راكب حصان
والحصان فى الدايره لأفف فى الملاهى
فوق خيالات المآته فى الغيطان
والكبير لسالك بتنده على الكبير
دا الكبير ناقص تملى وكل حاجه مضاف اليه
من أول الكوبرى الكبير للمكتبه
وكلها مع بعضها مترتبه ومتسلسله
وسيناريوهات السلسله
فيها قضيه ومتهم
والمتهم صاحبك والمتهم صاحبى
المتهم مجرم خطير والتهمه
داس فى خيال ضل الكبير
لما كان ماشى فى ميدان العولمه
والتهمه لازم تبقى صح ومحكمه
لكنهم نصبهم خلاص المشنقه
قبل المحاكمه ماتبدى
وانتهى دور المفتش والنيابه والدفاع
والظلم شاع
والعدل ضاع بين البشر والعدل ضاع
قال المفتش ع المشاع
أنا مش حافتش فى البدن
أنا راح أفتش فى القلوب
عن أى ذره لليقين
وفى العيون عن شعاع نور الأيمان
وعن تراث بيشع جوه العقل دين
قال الدفاع
تقصد تقول القنبله
تقوى ويقين وايمان ودين
يامتهم لو كلنا متسلحين
تقوى ويقين وايمان ودين
شد القتيل واستنى صوت الأنفجار
واستنى صوت الأنفجار
رابط مختصر: